రుద్రవరంలో శాకాంబరీ దేవిగా విలసిల్లిన శ్రీ వాసవి కన్యకా పరమేశ్వరి అమ్మవారు

రుద్రవరం మండల కేంద్రంలోని శ్రీ వాసవి కన్యకా పరమేశ్వరి దేవస్థానంలో శుక్రవారం రోజున అమ్మవారు శాకాంబరీ దేవి అలంకరణలో భక్తులకు దర్శనమిచ్చారు. ఆషాఢ మాసం సందర్భంగా నిర్వహించిన ఈ ప్రత్యేక పూజా కార్యక్రమంలో ఆర్యవైశ్యులు అధిక సంఖ్యలో పాల్గొని అమ్మవారిని కూరగాయలు, పండ్లతో అందంగా అలంకరించి ప్రత్యేక పూజలు నిర్వహించారు. ఈ పూజా కార్యక్రమానికి పెరుమాళ్ళ నరసింహయ్య కుటుంబ సభ్యులు పూజా దాతలుగా వ్యవహరించారు. మహిళలు సామూహికంగా అమ్మవారికి చీర సారెలను సమర్పించారు. వీరిని ఆర్యవైశ్య కమిటీ సభ్యులు సత్యనారాయణ స్వామి దేవస్థానం నుండి మేళ తాళాలతో అమ్మవారిశాల వద్దకు ఘనంగా తీసుకొచ్చారు. భక్తులు సమర్పించిన అన్ని రకాల కూరగాయలు, పండ్లను అమ్మవారి ముందు ఉంచి ప్రత్యేక పూజా కార్యక్రమాలు నిర్వహించారు. ఉదయం అమ్మవారికి పంచామృతాభిషేకం వైభవంగా నిర్వహించారు. అనంతరం వివిధ రకాల కూరగాయలతో అమ్మవారిని శాకాంబరీ దేవిగా అలంకరించారు. భక్తులు పెద్ద సంఖ్యలో పాల్గొని సామూహిక కుంకుమార్చనలో పాల్గొన్నారు. సాయంత్రం వేళ మహా మంగళ హారతి కార్యక్రమం జరిగింది. అనంతరం భక్తులకు అన్నదానం నిర్వహించారు. ఆషాఢ మాసంలో శాకాంబరీ దేవి అలంకరణ నిర్వహించడం వెనుక ఉన్న విశిష్టతను ఆలయ పూజారి రామడుగు కౌశి విశ్వనాథ శర్మ వివరించారు. "ఆషాఢ మాసం వర్షాకాలం ప్రారంభాన్ని సూచిస్తుంది. ఈ సమయంలో ప్రకృతి పచ్చగా, సస్యశ్యామలంగా ఉంటుంది. శాకాంబరీ దేవి దుర్గాదేవి యొక్క అవతారాలలో ఒకటి. ఆమె తన శరీరం నుండి శాకములను (కూరగాయలు, పండ్లు) సృష్టించి లోకాన్ని కరువు నుండి రక్షించిందని పురాణాలు చెబుతున్నాయి. ఈ అలంకరణ ద్వారా అమ్మవారిని ఆరాధించడం వల్ల పంటలు సమృద్ధిగా పండి, ప్రజలకు సుఖశాంతులు చేకూరుతాయి. ధాన్యం, కూరగాయలు, పండ్లు సమృద్ధిగా లభించి, ప్రజలు ఆకలి బాధలు లేకుండా జీవిస్తారని ప్రగాఢ విశ్వాసం," అని ఆయన తెలిపారు. ఈ కార్యక్రమంలో ఆర్యవైశ్య సంఘం అధ్యక్షుడు చోళవేటి సూర్యనారాయణ, కోశాధికారి పెరుమాళ్ళ నరసింహయ్య, కార్యదర్శి పాలూరు సుబ్రమణ్యం, కమిటీ సభ్యులు, యువజన సంఘం వారు, రుద్రవరం గ్రామ మరియు మండల ఆర్యవైశ్యులు పెద్ద సంఖ్యలో పాల్గొని అమ్మవారి కృపకు పాత్రులయ్యారు.