నిలిచిన రోడ్డు విస్తరణ పనులు. ఇబ్బందులు పడుతున్న ప్రయాణికులు గ్రామస్తులు

రుద్రవరం ప్రతినిధి మే 18 (నంది పత్రిక):

మండల కేంద్రం రుద్రవరం నుంచి నరసాపురం వైపు వెళ్లే ప్రధాన రహదారిలో రోడ్డు విస్తరణ పనులు నిలిచిపోయాయి. దీంతో వాహనదారులు గ్రామస్తులు తీవ్ర ఇబ్బందులు పడుతున్నారు. గత ప్రభుత్వ హయాంలో చాగలమర్రి నుంచి మహదేవపురం వరకు రోడ్డు విస్తరణ పనుల కోసం నిధులు మంజూరు అయ్యాయి. దీంతో నరసాపురం వరకు రోడ్డు విస్తరణ పనులు పూర్తి అయ్యాయి. నరసాపురం నుంచి రుద్రవరం వరకు పనులు నిలిచిపోవడంతో ప్రస్తుతం కాంట్రాక్టర్లు పనులు తిరిగి ప్రారంభించారు. ప్రారంభించిన రెండు రోజులకే పనులను నిలిపివేశారు. రోడ్డు మరమ్మతుల కోసం తీసిన గుంతలు ప్రమాదకరంగా మారాయి. వాహనాలు రాకపోకల సమయంలో ఎదురెదురు పడిన సందర్భంలో ప్రమాదాలు జరుగుతున్నాయి. గత రెండు రోజుల క్రితం తువ్వపల్లి గ్రామానికి చెందిన ఓ వ్యక్తి రోడ్డు మరమ్మతుల కోసం తీసిన గుంతలో పడి తీవ్రంగా గాయపడ్డారు. అలాగే ఈ రహదారి వెంట మహానంది, అహోబిలం , చాగలమర్రి, ఆళ్లగడ్డ తదితర గ్రామాలకు నిత్యం వాహనాలు రద్దీగా తిరుగుతుంటాయి. ప్రస్తుతము భారీ వర్షాలు కురుస్తుండడంతో వాహనాలు రాకపోకలకు తీవ్ర అంతరాయం ఏర్పడుతుంది. వాహనాలు ప్రయాణం చేయాలంటే ప్రాణాలు అరచేతిలో పెట్టుకుని వాహనదారులు నడుపుతున్నారు. రోడ్డు నిర్మాణ పనులు ఇలా అర్ధాంతరంగా ఆగిపోవడం పట్ల వాహనదారులు గ్రామ ప్రజలు ఆవేదన వ్యక్తం చేస్తున్నారు. కొందరు నాయకులు తమ స్వార్థం కోసము ఇలా రోడ్డు నిర్మాణ పనులను ఆపడం పట్ల ఆవేదన వ్యక్తం చేస్తున్నారు. ఉన్నతాధికారులు జోక్యం చేసుకొని వెంటనే ఆగిపోయిన రోడ్డు విస్తరణ పనులను ప్రారంభించాలని ప్రయాణికులు గ్రామస్తులు కోరుతున్నారు.